Панама ҳукумати АҚШ ҳарбий кемаларининг Панама канали орқали бепул ўтиши ҳақидаги АҚШ баёнотини рад этди

Панама канали атрофида чалкашлик юзага келди. АҚШ Давлат департаменти Америка ҳарбий кемаларининг канал орқали бепул ўтиши бўйича келишувга эришилганини эълон қилди. Уларнинг таъкидлашича, Панама АҚШ давлат кемалари учун барча тўловларни бекор қилишга рози бўлган, бу эса ҳар йили миллионлаб доллар тежаш имконини беради.

Бироқ, бир неча соат ўтиб, Панама канали администрацияси бу баёнотни қатъиян рад этди. Расмий баёнотда айтилишича, канал тарифлари ва қоидаларида ҳеч қандай ўзгариш бўлмаган ва АҚШ билан музокаралар ҳали давом этмоқда.

«Панама канали Америка расмийлари билан ҳарбий кемаларнинг ўтиши масаласида мулоқот қилишга тайёр», — дейилади канал маъмуриятининг баёнотида.

АҚШ баёноти давлат котиби Марко Рубионинг Панамага ташрифидан кейин пайдо бўлди. У агар канални ишлатиш шартлари ўзгармаса, Вашингтон муайян чоралар кўриши мумкинлигини таъкидлади. Шунингдек, АҚШ канал хавфсизлигини таъминлашга мажбур бўлсада, ундан фойдаланиш учун тўлов тўлашига норозилик билдирди.

Бундан олдин Доналд Трамп 1999 йилдан бери Панаманинг тўлиқ ихтиёрида бўлган канал устидан назоратни қайтариб олиш билан таҳдид қилган эди. Асосий баҳс АҚШ ҳарбий кемалари учун тўлов масаласида давом этмоқда. Панама ҳақиқатдан ҳам ён берганми ёки бу фақат дипломатик тушунмовчиликми — ҳозирча номаълум.