Фаластинликлар уйларининг вайрон бўлганини кўриб, умидсизликка тушишди

Ғазо сектори бўйлаб ўз уйларига қайтган фаластинликлар кўпинча бир пайтлар гавжум бўлган маҳаллалар ўрнида вайроналар уюмини кўришди.

"Яшаш ёки қолиш учун бирор жой топармиз деб ўйлагандик," - деди олти фарзандли ёлғиз она Манал Салим Ғазо жанубидаги Рафоҳдаги уйига қайтгани ҳақида Associated Press нашрига. - "Вайронагарчилик даҳшатли. Бу қиёмат кунига ўхшайди."

"Бу менинг уйим. Мен уни 25 йил давомида ғишт-ғишт қилиб қургандим," - деди у бир пайтлар сартарош бўлиб ишлаган ва кўйлаклар ижарага берган уйидан йиртилган кийимларни тортиб чиқарар экан.

Уч қаватли бинода жойлашган уйи ва электр жиҳозлари дўкони бутунлай вайрон бўлганини кўрган Мурод Миқдод: "Ҳеч нарса тополмадик," - деди. - "Уйдан ҳеч нарса олиб чиқиб бўлмайди, агар бирор нарсани олишга муваффақ бўлсанг ҳам, барибир ундан фойдалана олмайсан."