Zelenskiy: "Harbiy qismdan so‘ng, har qanday holatda, tinchlik jarayoni bo‘lishiga ishonchim komil"

Davosdagi Ukraina nonushtasida internet orqali so‘zlagan Vladimir Zelenskiy Ukrainadagi urush tinch yo‘l bilan yakunlanishini aytdi, biroq Rossiyaning qaysi prezidenti Ukraina bilan muzokara olib borishi hozircha aniq emas, deya ta’kidladi.

"Harbiy qismdan so‘ng, har qanday holatda, tinchlik jarayoni bo‘lishiga ishonchim komil. Muzokaralar stoli ham bo‘ladi. Va albatta tinchlik bo‘ladi. Savol: Ukraina kim bilan muzokara olib boradi? Savol: Rossiyaning qaysi prezidenti bilan. Bu Rossiyaning amaldagi prezidentining xohishiga ham bog‘liq”, — dedi Zelenskiy.

Zelenskiyning so‘zlariga ko‘ra, urushning tugash vaqti G‘arbning Rossiya bilan to‘qnash kelishdan qo‘rqmaslik, Ukrainaga qurol-yarog‘ bilan yordam berish va uni moliyaviy qo‘llab-quvvatlash istagiga bog‘liq.

"Va bu Rossiya Federasiyasining xohishiga ham bog‘liq, chunki bu urush baribir tugaydi", dedi Zelenskiy.

Uning so‘zlariga ko‘ra, "Rossiya tomoni qonli urushdan diplomatiyaga o‘tish istagini namoyon qilganida Kiyev muzokaralarga o‘tiradi".