Xitoyda jarrohlar 14 ta barmoqli qizning qo‘llarini to‘g‘rilashdi

Xitoyda 14 ta qo‘l barmog‘i bilan tug‘ilgan 3 yoshli qiz operasiya qilindi. Bu haqda Daily Mail nashri xabar berdi. 

Qizchaning har bir qo‘lida 2 tadan ortiqcha barmoq bo‘lgan. Bundan tashqari, panjalar bir-biridan farq qilgan: chap qo‘ldagi ikkita barmoq chatishib ketgan bo‘lgan, o‘ng qo‘ldagi ortiqcha barmoqlar esa boshmaldoqdan o‘sib chiqqan. Ta’kidlanishicha, qizchaning oilasida bunday nuqson 5 avlod davomida kuzatilgan. 

Qizchani operasiya qilgan jarrohning aytishicha, bunday muammoli odamlar ularga ko‘p kelmaydi.

“Operasiya qaysi barmoqlarni saqlab qolish, qaysilarini esa olib tashlash tushunarsiz bo‘lgani sababli qiyinchilik tug‘dirdi”, deb aytgan jarroh.

Shifokorlar va qizning yaqinlari qilingan ishdan mamnun qolganlar. Mutaxassislarning aytishicha, operasiya qizchaning qo‘lini risoladagidek ko‘rinishga keltirgan va motorikasiga ta’sir qilmagan.