Venesuelada jinoyatchi yo‘q qilindi, uning boshi uchun ular 1 million dollar va’da qilingandi

Venesuela huquq-tartibot idoralari mamlakatdagi eng faol qidiruvdagi jinoyatchilardan biri, Quyon (Konexo) laqabli Karlos Enrike Gomes Rodrigesni yo‘q qildi, uni qo‘lga olishda yordam bergani uchun 1 million dollar mukofot puli e’lon qilingandi.

Bu haqda ichki ishlar, adliya va tinchlik vaziri Remijio Sebalyos Venezolana de Television telekanalida efirga uzatilgan matbuot anjumanida ma’lum qildi.

Gomes terrorizm, qotillik, tovlamachilik va odam o‘g‘irlashda ayblangan, dedi u.

Ichki ishlar vazirligi rahbarining so‘zlariga ko‘ra, jinoyatchi Irapa (Sukre shtati) shahridan topilgan. U va jinoiy guruhning boshqa a’zolari qo‘riqchilarga qarshilik ko‘rsatishga uringan. Operasiya natijasida 36 nafar shaxs qo‘lga olinib, ulardan 16 dona o‘qotar qurol, 3 mingdan ortiq o‘q-dorilar, to‘qqizta yengil avtomobil va 14 dona motosikl musodara qilindi.

“Polisiya Venesuela xalqiga tinchlik va osoyishtalikni kafolatlash maqsadida Aragua, Karabobo va Sukre shtatlarida uyushgan jinoiy guruhning qolgan a’zolarini qidirishni davom ettirmoqda”, — deyiladi IIV xabarida.

Huquq-tartibot idoralari fevral oyi o‘rtalarida Gomesni qo‘lga olishga yordam berganlik uchun mukofot e’lon qildi. Shu hafta boshida prezident Nikolas Maduro rasmiylar jinoyatchi va korrupsiyada gumon qilinib hibsga olingan Santos-Mishelena (Aragua shtati) munisipaliteti rahbari Pedro Ernandes o‘rtasida aloqalar aniqlanganini ma’lum qilgan edi.