Vaqtincha lisenziyadan mahrum bo‘lgan xonandalar bundan buyon o‘z ijodlarini rivojlantirish va xalqga astoydil xizmat qilish va’dasini berganliklari tufayli, ularga yana ijodga qaytishga imkon berildi, deya bayonot e’lon qilgan "O‘zbekkonsert" davlat muassasasi.
Muassasa, shuningdek, ilgari ayrim sabablarga ko‘ra, ta’qiqqa uchragan xonandalarga ham davlat rahbarining g‘amxo‘rligi, bag‘rikengligi, kechirimliligi bois yana erkin ijodiy faoliyat yuritishga imkon berilganini eslatib o‘tgan. Lisenziyalar qaytarilishi munosabati bilan o‘tkazilgan brifingda mana shu ishlarning yana bir namunasi sifatida, ayrim sabablarga ko‘ra, lisenziyalari vaqtincha to‘xtatilgan qator xonandalarga ijodni davom ettirishlari uchun imkoniyat yaratilgani ma’lum qilingan.
Avval xabar berganimizdek, bular xonanda Abdulla Qurbonov, Jahongir Otajonov, Shahlo Ahmedova hamda qiziqchi Halima Ibragimovalardir.
"O‘zbekiston prezidentining san’at ahliga bo‘lgan g‘amxo‘rligi va mehribonligi, kechirimliligi hamda e’tibori soha xodimlariga albatta bemisl kuch-g‘ayrat va shijoat baxsh etadi. Bunday e’tiborga esa asl san’at namunalarini yaratish, xalqimizga astoydil xizmat qilish bilangina javob qaytarish lozim", - deya tushuntirish bergan san’atkorlarga "O‘zbekkonsert".