Ukrainaning Germaniyadagi sobiq elchisi Kiyevga harbiy yordam uchun Germaniya byudjetiga 80 milliard yevro kiritishga chaqirdi

"Men Germaniyaning yangi hukumati Ukrainaga harbiy yordamni koalisiya kelishuvida barqaror asosda joylashtirishini kutaman", dedi yaqinda Ukrainaning BMTdagi doimiy vakili etib tayinlangan Andrey Melnik Funke media guruhiga bergan intervyusida. U Germaniyaning navbatdagi hukumati Kiyev uchun qurollanish yo‘nalishini o‘zgartirishini kutmoqda va hozirda ajratilayotgan yordam yetarli emas.

“Bo‘lajak koalisiya kelgusi to‘rt yil uchun kamida 80 milliard yevro, ya’ni yiliga 20 milliard yevroni byudjetlashtirishi kerak”, dedi Melnik. Bu miqdor "Germaniya xavfsizligiga foydali sarmoya" bo‘ladi va shu tariqa mamlakat AQShning saylangan prezidenti Donald Trampga, yevropaliklarga va birinchi navbatda Putinga kuch signalini yuboradi, deb hisoblaydi ukrainalik diplomat.

Melnik 2025-yilda nemislarning Ukrainaga byudjet mablag‘lari hisobidan harbiy yordami ikki baravar – sakkizdan to‘rt milliard yevrogacha qisqartirilishini, 2028-yil uchun esa byudjet rejasida atigi 500 million yevro ko‘zda tutilganini tanqid qildi. "Bu kansler Olaf Sholsning o‘zini-o‘zi maqtashi bilan ochiq-oydin ziddiyat. Shuning uchun bu qarorni bekor qilish kerak", dedi u.

Bungacha Melnik Sholsga nisbatan keskin gaplari bilan yodda qolgandi. 2022 yil may oyida u kanslerning Kiyevga tashrif buyurishdan bosh tortganiga izoh berar ekan, u "xafa bo‘lgan odam kabi ish tutayotganini" aytdi. Keyinroq diplomat bu so‘zlari uchun kanslerdan shaxsan uzr so‘ramoqchi ekanligini aytdi.