Turkiya Prezidenti Rajab Toyib Erdo‘g‘an va Ozarbayjon Prezidenti Ilhom Aliyev o‘rtasida bo‘lib o‘tgan uchrashuvdan so‘ng ikki davlat o‘rtasida shartnomalar imzolandi. Bu haqda “Anadolu” nashri xabar berdi.
Ma’lum qilinishicha, bir kunlik tashrif bilan Naxchivanda bo‘lgan Prezident Erdo‘g‘an Ozarbayjon rahbari Ilhom Aliyev bilan uchrashuv o‘tkazdi. Ularning suhbati Naxchivan Muxtor Respublikasi Oliy Majlisida yakkama-yakka formatda bo‘lib o‘tdi.
Qayd etilishicha, ikki davlat rahbarlar “Turkiya Respublikasi bilan Ozarbayjon Respublikasi o‘rtasida Kars-Naxchivan temir yo‘li loyihasi bo‘yicha niyat protokoli”ni imzolagan.
“Ishonchim komilki, mazkur loyiha muvaffaqiyatli amalga oshiriladi va shu tariqa O‘rta yo‘lakning tarmoqlaridan biri sifatida Ozarbayjon, Turkiya va boshqa mamlakatlar manfaatlariga xizmat qiladi”, dedi Aliyev.
