2021 yilda Turkiyadan gul mahsulotlari eksporti o‘tgan yilga nisbatan 38 foizga oshib, rekord darajadagi 148 million dollarga yetdi. Bu ko‘rsatkich 2020 yilda 107 million dollarni tashkil qilgan. Bu haqda manzarali o‘simliklar va mahsulotlar eksportchilari uyushmasi rahbari Ismoil Yilmaz ma’lum qildi.
Yilmazning ta’kidlashicha, pandemiyadan oldin Kolumbiya, Ekvador va Keniya jahon bozorida gul mahsulotlarining asosiy eksportchilari bo‘lgan.
“Yuqori logistika xarajatlari bozor ishtirokchilarini Turkiyaga qarashga majbur qildi, bu esa eksport hajmining oshishiga olib keldi. Dunyoning 83 davlatiga gul mahsulotlari eksport qilamiz. Deyarli butun Yevropa, shuningdek, turkiy davlatlardan tortib Fors ko‘rfazi mamlakatlarigacha bo‘lgan keng hududda”, dedi u.
Yilmaz manzarali o‘simliklar eksportining muhim qismini chinnigullar tashkil etganini aytdi. Qizil, oq, binafsha rangdagi chinnigullar bayram tadbirlarida alohida talabga ega, deya qo‘shimcha qildi uyushma rahbari.
Nizomjon Islomov tayyorladi.