Ijtimoiy tarmoqlarda Toshkent shahri Mirobod tumanida noma’lum erkak maktabdan qaytayotgan qizga tashlangani aks etgan video tarqaldi.
Bosh prokuratura matbuot kotibi Hayot Shamsutdinovning Aniq.uzga ma’lum qilishicha, 19 aprel kuni soat 12:49 da voyaga yetmagan B.Z. qo‘shimcha darslardan qaytib kelayotganda Mirobod tumani Inoqobod ko‘chasida noma’lum shaxs orqasidan kelib, tegajog‘lik qilgan. So‘ngra hodisa joyidan qochib yashiringan.
Jabrlanuvchi qiz hozirda maktabning 11-sinfida o‘qiydi.
Shuningdek, qizga tagjog‘lik qilgan noma’lum shaxs taxminan 20-30 yoshlardagi o‘zbek millatiga mansub yigit ekani aytilmoqda.
Hozirda B.Z.ning otasidan ariza olinib, noma’lum fuqaroning shaxsini aniqlash hamda qidirib topish choralari ko‘rilmoqda. Holat yuzasidan tergovga qadar tekshiruv harakatlari olib borilmoqda.