Pxenyan 90 ta yadro kallaklarini yaratish uchun yetarli bo‘linuvchi material to‘plagan, ammo hozirga qadar atigi elliktasini qurgan. Bu haqda Amerika olimlari federasiyasining Shimoliy Koreya yadroviy arsenaliga doir tadqiqotida aytilgan.
«Shimoliy Koreya jangovar kallaklarni yetkazib berish uchun raketa kuchlarini yaratmoqda va diversifikasiya qilmoqda, jumladan, yaqinda yangi qattiq yonilg‘i bilan ishlaydigan uzoq masofaga mo‘ljallangan strategik raketalar, qisqa masofali taktik raketalar va dengizdan uchiriladigan raketalar ishlab chiqilmoqda», — deyiladi hisobotda.
Stokgolm xalqaro tinchlik tadqiqot instituti avvalroq dunyodagi yadro kallaklari sonini hisoblagan edi. Ulardan Rossiya eng ko‘p - 5580. Ikkinchi o‘rinda AQSh (5044), uchinchi o‘rinda Xitoy (500) joylashgan.