Shanba kuni Sergelida “Isuzu” rusumli 104-yo‘nalishdagi avtobus ag‘darilib ketdi. YTH natijasida 2 kishi kasalxonaga yotqizildi. Qolganlar tekshiruvdan o‘tkazilib, uyiga ruxsat berib yuborildi. Hozirda tekshiruv ishlari olib borilmoqda.
24 avgust kuni soat 18:30larda Toshkent shahridagi “12-sonli avtobus saroyi” AJ haydovchisi 57 yoshli F.M. 104-yo‘nalishidagi “Isuzu” rusumli avtobusni Sergeli tumanidagi Xonobod tepa ko‘chasida joylashgan “Laylo” to‘yxonasi oldida haydab ketayotgan vaqtida avtobusning old chap tomon ressor qismi sinib ketgan. Oqibatda haydovchi boshqaruvni eplay olmagan va avtobus ag‘darilgan.
Natijada avtobusning 2 nafar yo‘lovchisi, Sergeli tumanida yashovchi 59 yoshli G.X. ismli ayol va Buxoro viloyati Olot tumanida yashovchi 2015 yilda tug‘ilgan Z.P. ismli qiz jarohat olib kasalxonaga yotqizilgan.
Avtobusda bo‘lgan 6 nafar yo‘lovchiga kasalxonada tibbiy yordam ko‘rsatilib, uyiga javob berilgan. Shuningdek, avtobusning qolgan yo‘lovchilari hech qanday tan jarohati olmagan.
Holat yuzasidan dastlabki tergovoldi harakatlari olib borilmoqda.