Putin Ukrainadagi urushni tugatish niyatida emas

AQSh prezidenti Donald Tramp 19 may kuni Vladimir Putin bilan telefon suhbatidan so‘ng Yevropa yetakchilari bilan yakkama-yakka suhbatlarda Rossiya prezidenti Ukrainadagi urushni tugatish niyatida emasligini, chunki u g‘alaba qozonayotganiga ishonganini aytdi.

Bu haqda The Wall Street Journal uchta xabardor manbaga tayanib yozmoqda.

Nashrning yozishicha, yevropalik yetakchilar uchun bu avvallari faqat bilvosita belgilarga asoslangan taxminlarining birinchi to‘g‘ridan-to‘g‘ri tasdig‘i bo‘ldi. Shunisi e’tiborga loyiqki, Trampning so‘zlari Putinning tinchlikka intilishi haqidagi o‘zining ommaviy bayonotlariga zid keladi.

Bundan tashqari, Amerika yetakchisi bir kun avval ittifoqchilariga Putin o‘t ochishni to‘xtatishdan bosh tortsa, choralarni kuchaytirishini aniq bildirganiga qaramay, Rossiyaga qarshi yangi sanksiyalar joriy etishdan bosh tortdi. Tramp bosim o‘rniga Moskva va Kiyev o‘rtasidagi muzokaralarni davom ettirishga chaqirdi.

The New York Times nashri xabar berishicha, Vladimir Zelenskiy bilan suhbatda Tramp Ukraina "Putinning o‘zi bilan muzokara olib borishi" kerakligini ta’kidlab, "Bu mening urushim emas, biz o‘zimizni qo‘shmasligimiz kerak bo‘lgan narsaga qo‘l urdik", dedi.

WSJ manbalarining ta’kidlashicha, Rossiya va Ukraina o‘rtasidagi muzokaralarning navbatdagi bosqichi iyun oyi o‘rtalarida Vatikanda bo‘lib o‘tishi mumkin. Tramp unga Davlat kotibi Marko Rubio va maxsus elchi Keyt Kellogni jo‘natish niyatida. Yevropa yetakchilari yig‘ilish natijasida so‘zsiz o‘t ochishni to‘xtatishni talab qilgan bo‘lsa-da, Tramp avvalroq "30 kunlik shartsiz o‘t ochishni to‘xtatish"ga chaqirganiga qaramay, "shartsiz" so‘zini ishlatishga qarshilik qildi.