Oq uy rahbari: Isroil endi Qatarga zarba bermaydi

AQSh prezidenti Donald Trampning aytishicha, Isroil Qatarga qarshi yana hujum uyushtirmaydi.

Oval kabinetda jurnalistlar savollariga javob bergan Amerika rahbari Isroilning yaqinda Dohada amalga oshirgan havo zarbasiga izoh berdi. Tramp Qatarni “juda yaxshi ittifoqchi, lekin ko‘pchilik bundan bexabar” deya ta’kidladi. Uning so‘zlariga ko‘ra, Isroil bosh vaziri Binyamin Netanyaxu Qatarga takroriy zarba berilmasligini ma’lum qilgan.

Prezidentning ta’kidlashicha, Isroil “faqat HAMAS harakatiga e’tibor qaratishi mumkin”.

Oldindan ogohlantirish haqida xabarlar

Avvalroq Axios nashri Vashington zarba haqida oldindan xabardor qilinganini yozgandi. Ma’lumotlarga ko‘ra, Netanyaxu Tramp bilan soat 08:00 da gaplashgan, zarba esa 08:51 da amalga oshirilgan. Nashr manbalariga ko‘ra, AQSh rahbari hujumga e’tiroz bildirmagan.

Biroq Trampning o‘zi bu haqda oldindan bilganini inkor etdi va Qatarni “muhim hamkor” sifatida ta’rifladi. AQSh rasmiylari esa raketalar uchirilganini payqab, Isroildan tushuntirish so‘raganini aytdi.

Isroilning Dohadagi zarbasi

9 sentyabr kuni Isroil havo kuchlari Dohadagi HAMAS muzokarachilari joylashgan binoga zarba berdi. Natijada olti kishi halok bo‘ldi: ular orasida HAMAS siyosiy byurosi a’zosi Xolil al-Hayiyning o‘g‘li, to‘rt nafar harakat jangchisi va bir qatorlik polisiyachi bor edi.

10 sentyabrda Bosh vazir Netanyaxu Qatarga nisbatan yangi chora ko‘rish bilan tahdid qildi: “Yo ularni haydaysiz, yo javobgarlikka tortasiz, bo‘lmasa, o‘zimiz amalga oshiramiz”, dedi u.