Nazm va navo kechasi

Madaniyat vazirligi tomonidan tashkil etilgan mazkur tadbirda O‘zbekiston davlat filarmoniyasi badiiy jamoalarining ustoz san’atkorlari hamda yosh ijrochilari ishtirokidagi musiqiy dastur hamyurtlarimiz e’tiboriga havola etildi.

Mumtoz musiqa san’atimiz rivojida Navoiy va Bobur ijodiy merosi o‘ziga xos o‘rin tutadi. Ularning betakror g‘azallari bilan kuylanuvchi musiqiy asarlar san’at muxlislarining ko‘ngil mulkiga aylangan. Ayni paytda mazkur musiqiy asarlar mukammalligi, betakrorligi, teran va yuksak badiiy-falsafiy ruhi bilan ham qadrlidir.

Musiqashunoslarning fikricha, buyuk ajdodlarimiz so‘zlariga bastalangan badiiy barkamol qo‘shiqlar tinglovchilarning estetik didini yuksaltirish, musiqiy saviyasini oshirish, ona tilimizga yanada ko‘proq hurmat va e’tibor bilan munosabatda bo‘lishda o‘ziga xos o‘rin tutadi. Navoiy va Bobur ijodidagi mushtaraklik musiqa, tarix, tasviriy san’at, me’morchilik ravnaqiga oid asarlarida, ushbu sohalar rivoji yo‘lidagi ezgu sa’y-harakatlarida hamda san’at va hunar ahliga muttasil homiyligi va g‘amxo‘rligida ham yaqqol namoyon bo‘ladi. Har ikki ijodkor g‘azal va ruboiylarining ajib musiqiyligi ajdodlarining noyob zakosidan darak beradi.

Nazm va navo kechasida badiiy jamoalar va xonandalar ishtirokida chin insoniy fazilatlar, ezgulik, odamiylik, mehr va sadoqatni tarannum etuvchi qo‘shiqlar, jozibali raqslar ijro etildi.

Manba: uza. uz