Moskvada alkogolizmga chalinganlar soni keskin oshdi

Ukrainadagi urushning ikkinchi yilida Moskvadagi xususiy narkologiya klinikalarida yangi tashxis qo‘yilgan spirtli ichimliklarga qaramlik bilan og‘rigan bemorlar soni keskin o‘sdi, deya xabar bermoqda "RBK".

O‘tgan yili "Klinika doktora Isayeva"da bunday bemorlar 2022 yilga nisbatan 44 foizga oshgan. Marshak klinikasida birinchi marta kasallanganlar sonining o‘sishi 27 foizni, ProMed klinikasida esa 15,5 foizni tashkil etdi, deya xabar beradi "RBK"ga tibbiyot muassasalari.

"Har doim, inqirozlar vaqtida, spirtli ichimliklarni iste’mol qilishda o‘sish bo‘lgan: odamlar qandaydir xotirjamlikni izlashadi, unutishni istashadi", - deydi "Klinika doktora Isayeva" shifoxonasi psixiatri, narkolog, narkologiya va psixiatriya bo‘limi boshlig‘i Ruslan Isayev.

Tibbiyot mutaxassisi bundan oldin koronavirus pandemiyasi davrida ham spirtli ichimliklarni iste’mol qilish sezilarli darajada oshgani va natijada narkologik davolanishga bo‘lgan talab oshganini eslatib o‘tdi. Unga ko‘ra, 2019 yilda 2018 yilga nisbatan birinchi marta aniqlangan alkogolizm bilan kasallangan bemorlarning o‘sishi Doktor Isayev klinikasida 10 foiz, Marshak klinikasida 18 foiz, ProMed klinikasida esa 13 foizni tashkil etdi.

Ukrainada urush boshlanganidan keyin bemorlarning takroriy tashriflari soni ortdi, deydi Marshak klinikasi shifokori Dmitriy Vashkin.

"Odamlar stressni, xavotirni boshdan kechirdi va bu giyohvandlikning qaytalanishini keltirib chiqardi", deb tushuntirdi u.

"Spirtli ichimliklarga qaramlik holatlari soni besh yildan beri oshib bormoqda va o‘sish har yili taxminan 15 foizni tashkil qiladi", deydi ProMed narkologiya klinikasi bosh direktori Mariya Kulinskaya.

"Alkogol haqiqatdan" qochish ", kelajakka nisbatan qo‘rquv va noaniqlik bilan kurashish usuliga aylanadi", deya qo‘shimcha qildi u.

"Shu bilan birga, tendensiya 2024 yilda ham davom etishi aytilmoqda: 2024 yilning birinchi choragida so‘rovlar soni o‘tgan yilning shu davriga nisbatan 20 foizga oshdi", dedi Vashkin. Sotilayotgan spirtli ichimliklar statistikasi ham aholining alkogolizmga qay darajada chalinganidan dalolat beradi. 2023 yilda oxirgi to‘qqiz yildagi rekord yangilandi: 15 yoshdan oshgan iste’molchiga 8 litrgacha toza spirt to‘g‘ri kelmoqda.