Koronavirusning yangi — ikkinchi to‘lqini noyabr-dekabr oylarida yuz berishi mumkin. Bu haqda shifokorlarning butunjahon kasaba uyushmasi WMA’ning sobiq rahbari professor Leonid Eydelman aytib o‘tdi.
Olimning ta’kidlashicha, kasallikning yangi to‘lqiniga jiddiy tayyorlanish lozim:
«Har yildagi kabi noyabr-dekabrda nafas yo‘llari kasalliklari ko‘payishini anglash lozim. Shu sababli yo‘talayotgan, aksirayotgan kasallarni koronavirusga chalinganlardan farqlash qiyin bo‘ladi. Aynan shu katta muammodir».
Koronavirusning kuzgi to‘lqini karantin cheklovlari bekor qilingani sababli yozgisidan kuchliroq bo‘ladi.
Hozirda koronavirusga chalinganlar soni butun dunyoda ko‘paymoqda. «Aslida kasallanganlar soni aniqlanganlaridan ko‘proqni tashkil qiladi», deb qo‘shimcha qilgan Eydelman.