Justina Shiroka Pula Kosovoning yangi prezidenti!

Kosovo parlamenti 73 yoshli Justina Shiroka Pulani mamlakat prezidenti etib sayladi. U uchun 81 nafar deputat ovoz berdi. Shu tariqa mamlakatda uzoq davom etgan siyosiy tanglik fonida navbatdan tashqari parlament saylovlarini o‘tkazish ehtimolining oldi olindi.

Prezidentlik saylovi parlamentdagi keskinlik va Kosovo Ozodlik armiyasining sobiq yetakchilariga chiqarilgan hukmlarga qarshi namoyishlar fonida o‘tkazildi. Prezidentni saylash uchun belgilangan konstitusiyaviy muddat chorshanba kuni yarim tunda yakunlanishi kerak edi.

Hukmron «Vetevendosje» harakati (LVV) va muxolifatdagi Kosovo Demokratik partiyasi (PDK) Pulaning nomzodi bo‘yicha kelishib oldi. U 81 ta ovoz olib, prezidentlik uchun talab etilgan uchdan ikki qism — 80 ovozlik chegaradan bir ovoz ko‘proq to‘pladi.

1953 yilda Prishtinada tug‘ilgan Justina Shiroka Pula iqtisodchi, akademik va siyosatchi sifatida faoliyat yuritgan. U Prishtina universitetining iqtisodiyot fakultetini tamomlagan, va Kosovoning iqtisodiy rivojlanishi o‘rtasidagi bog‘liqlik bo‘yicha doktorlik dissertasiyasini himoya qilgan.

2025 yil dekabr oyida Shiroka Pula Kosovo Fanlar va san’at akademiyasi rahbari etib saylangan ilk ayol bo‘lgan.

Shiroka Pula 2008–2011 yillarda Kosovoning energetika va konchilik vaziri, 2011–2014 yillarda esa PDK vakili sifatida parlament deputati bo‘lib ishlagan.

Shiroka Pula Kosovoning uchinchi ayol prezidenti bo‘ldi. Undan avval Atifete Jahjaga va Vjosa Osmani prezidentlik lavozimini egallagan.

Kosovo prezidentining rasmiy ijro vakolatlari cheklangan bo‘lsa-da, lavozim mamlakatning siyosiy va diplomatik hayotida muhim o‘rin tutadi. Prezident Kosovo nomidan mamlakat ichida va xalqaro maydonda vakillik qiladi, davlat institutlari uzluksizligini ta’minlashga ko‘maklashadi hamda siyosiy kuchlar o‘rtasidagi kelishmovchiliklarda vositachilik qilishi mumkin.

Shiroka Pula prezidentlik faoliyatini hukmron LVV va PDK ko‘magida boshlaydi.