G20 sentyabr oyida Hindistonning Nyu-Dehli shahrida bo‘lib o‘tgan sammitida Afrika Ittifoqiga forumning doimiy a’zoligini taqdim etdi va endi ular Yevropa Ittifoqi bilan teng huquqli mintaqaviy ovoz sifatida xizmat qiladi. Bu harakat Global Janubning xalqaro iqtisodiy masalalardagi pozisiyasini mustahkamlagani uchun olqishlanmoqda.
G20 tarkibiga endi dunyoning eng yirik iqtisodiy davlatlari – Argentina, Avstraliya, Braziliya, Kanada, Xitoy, Fransiya, Germaniya, Hindiston, Indoneziya, Italiya, Yaponiya, Koreya, Meksika, Rossiya, Saudiya Arabistoni, Janubiy Afrika, Turkiya, Buyuk Britaniya, Amerika Qo‘shma Shtatlari qatorida Afrika va Yevropa ittifoqining mintaqaviy bloklari kiradi. Guruhning kengayishi, katta ehtimollik bilan uning G21 deb atalishiga olib keladi.
55 a’zodan iborat Afrika Ittifoqi ilgari G20da "mehmon xalqaro tashkilot" maqomiga ega edi, Janubiy Afrika esa qit’aning yagona rasmiy a’zosi bo‘lgan.
Afrika Ittifoqi komissiyasi rahbari Mussa Faki Mahamat X ijtimoiy media platformasida "Men Afrika Ittifoqining G20 ga to‘liq a’zo sifatida kirishini mamnuniyat bilan qabul qilaman. Biz uzoq vaqtdan buyon qo‘llab-quvvatlab kelayotgan ushbu a’zolik qit’aning targ‘ibotini kuchaytirish va uning global muammolarni hal qilishga samarali hissasini qo‘shish uchun qulay asos yaratadi", — deya o‘z fikrlari bilan bo‘lishdi.
