Fransiyaning Hermès modalar uyining asosiy aksiyadori, 80 yoshli Nikolas Puesh sobiq bog‘bonini asrab olmoqchi va uni milliardlari vorisi qilmoqchi. Bu haqda Kazinform agentligi Euronews.comga tayanib xabar beradi.
Tribune de Genève nashrining yozishicha, hashamatli charm buyumlar brendining 5-6 foiziga egalik qiluvchi Puesh o‘z boyligining yarmini 51 yoshli kamtarin Marokash oilasidan chiqqan “sobiq bog‘boni va qora ishchisi”ga o‘tkazmoqchi.
Har yili Shveysariyaning 300 ta eng badavlat kishilari ro‘yxatini tuzuvchi Bilan jurnali ma’lumotlariga ko‘ra, uning boyligi 9-10 milliard Shveysariya franki (9,4-10,4 milliard yevro)ga baholangan.
Hermès asoschisining nabirasining rejalari amalga oshishi noma’lum.
Ma’lumotlarga ko‘ra, Shveysariyaning Vale kantonida yashovchi Puesh farzandlikka olish jarayonida yordam so‘rab advokatlarga murojaat qilgan. Shveysariyada kattalar farzandlikka olish mumkin emas.
Rejani amalga oshirishdagi qiyinchiliklar Pueshning 2011 yilda Jenevada joylashgan Isocrates jamg‘armasi bilan imzolangan merosxo‘rlik shartnomasidan kelib chiqqan. Vorislik shartnomasi vasiyatnomadan ko‘ra ko‘proq yuridik kuchga ega.
AFP agentligiga bergan intervyusida Isocrates vakillari kelishuvning bir tomonlama bekor qilinishini “asossiz” deb atadi.
Jamg‘arma o‘ziga to‘liq bog‘liq bo‘lmagan holatlar tufayli xavf ostida qolganidan afsusda.
"Biz bu masalani muhokama qilish uchun ochiq qoldiramiz", - deb ta’kidladi tashkilot.
