Ijtimoiy tarmoqlarda «Farg‘ona tumanida maktab remontiga o‘qituvchilardan yig‘di-yig‘di boshlandi» mazmunidagi xabar joylashtirildi. Farg‘ona viloyat xalq ta’limi boshqarmasi ushbu xabarga rasmiy munosabat bildirdi.
"Avvalo shuni ta’kidlash joizki, viloyat xalq ta’limi boshqarmasi tomonidan bunday topshiriqlar berilmagan. Aksincha, o‘quvchi, o‘qituvchi va ta’lim tizimida faoliyat olib borilayotganlarni majburiy mehnatga jalb qilish, ulardan maktab ta’miri uchun, tadbirlar o‘tkazish va boshqa bahonalar asnosida pul to‘plash, yo ish haqlaridan mablag‘ ushlab qolinishiga mutlaqo yo‘l qo‘yilmaydi.
Ijtimoiy tarmoqlarda tarqatilgan xabar esa viloyat xalq ta’limi boshqarmasi boshlig‘i tomonidan nazoratga olingan. Holat tegishli tartibda o‘rganiladi va uning natijalari albatta ma’lum qilinadi", deyiladi munosabatda.