12 mart kuni Farg‘ona xalqaro aeroportida Novosibirskdan S7-5561 reysi bilan uchgan S7 Airlines (Rossiya) aviakompaniyasining Boeing 737-800 samolyoti uchish-qo‘nish yo‘lagida qolib ketgani tufayli aeroport bir necha soatga yopilib, Boeing 737 samolyoti parvozdan chetlatildi. Bu haqda «Aviatorshina» xabar berdi.
Qayd qilinishicha, samolyot qo‘ngandan so‘ng, uchish-qo‘nish yo‘lagida harakatlanayotganda o‘ng asosiy shassidagi tashqi g‘ildirak chiqib ketgan. Kema komandiri samolyotni to‘xtatib, muhandis-texnik xodimlarni chaqirgan. Samolyotni ko‘zdan kechirish chog‘ida g‘ildirakni ushlab turuvchi murvatlardan bir qanchasi yetishmayotgani aniqlangan.
Shundan so‘ng, yo‘lovchilar uchish-qo‘nish yo‘lagiga tushirilib, yuklari bilan birga aeroport terminaliga yetkazilgan. Boeing 737 samolyoti parvozdan chetlatilgan va bir necha soatdan keyin perronga olib borilgan.
Ta’kidlanishicha, Farg‘ona aeroporti yagona uchish-qo‘nish yo‘lagi to‘silib qolgani sababli vaqtincha yopilgan. Shu sababli Vnukovodan Farg‘onaga parvoz qilgan Utair aviakompaniyasining Boeing 737 samolyoti Toshkent aeroportiga qo‘nishga majbur bo‘lgan.
S7 aviakompaniyasi O‘zbekistondan qaytish parvozini amalga oshirish uchun Novosibirskdan zaxiradagi samolyotni yuborgani ta’kidlanmoqda.
"Ko‘rinmas" rus dronlari Ukraina artilleriyasini mazax qilmoqda
Rossiya Su-35’larni Xitoyga sotib xato qildimi? Xitoy Su-35’larni uchish uchun emas, nusxa olish uchun olgan!
“Malika”da 23 yoshli yigit 6 milliard so‘mlik firibgarlik qildi
