Eron TIV: "Eron o‘zining yadroviy dasturi bo‘yicha G‘arb bilan muzokaralarga tayyor"

Eron yadro dasturi bo‘yicha kelishuvga erishish uchun G‘arb bilan konstruktiv muzokaralarni zudlik bilan tiklashga tayyor.

Bu haqda Eron tashqi ishlar vaziri Abbos Aragchi Xitoy markaziy televideniyesiga bergan intervyusida ma’lum qildi.

Uning so‘zlariga ko‘ra, Tehron "avvalgi formula – Qo‘shma keng qamrovli harakatlar rejasi, ya’ni sanksiyalarni bekor qilish evaziga Eronning yadroviy dasturiga ishonchni mustahkamlash” bo‘yicha muzokaralarga tayyor.

Vazirning ta’kidlashicha, Eron yadroviy kelishuvning barcha qismlarini bajargan, "lekin AQSh hech qanday sabab va asoslarsiz undan chiqishga qaror qilgan".

Aragchining aytishicha, uch Yevropa davlati (Britaniya, Fransiya, Germaniya) bilan muzokaralarning birinchi bosqichi allaqachon yakunlangan va ikkinchi raundni keyingi ikki hafta ichida o‘tkazish bo‘yicha kelishuvga erishilgan.

AQSh esa, uning fikricha, yangi hukumat o‘z siyosatini shakllantirishi kerak va Eron "buning asosida qaror qabul qiladi".