Mazkur qaror loyihasi O‘zbekiston Respublikasi Energetika bozorini rivojlantirish va tartibga solish agentligi tomonidan ishlab chiqildi.
Unga ko‘ra, taqsimlash elektr tarmoqlaridan foydalanish qoidalari taqsimlash elektr tarmoqlaridan oqilona va shaffof foydalanish shartlarini o‘rnatish orqali elektr energiyasi va boshqa yordamchi xizmatlarning raqobatli bozorlarida faoliyat sohasidagi munosabatlarni tartibga soladi.
Ushbu qoidalar elektr energiyasini yetkazib berish, taqsimlash va iste’mol qilishda umumiy taqsimlash elektr tarmoqlaridan foydalanishni soddalashtirish hamda barcha ishtirokchilarga teng shart-sharoitlar yaratish maqsadida ishlab chiqilgan.
Qoidalar taqsimlash tizimi operatori, yetkazib beruvchilar, elektr energetika sohasidagi nazorat organi, iste’molchilar hamda loyihalash, qurilish-montaj, ishga tushirish-sozlash tashkilotlari va boshqa barcha foydalanuvchilar, xizmat ko‘rsatuvchilar tomonidan bajarish uchun majburiy hisoblanadi.
Energetika bozorini rivojlantirish va tartibga solish agentligi axborot xizmatiga ko‘ra, qaror loyihasi bo‘yicha muhokamalar O‘zbekiston Respublikasi Normativ-huquqiy hujjatlar loyihalari muhokamasi portali “Regulation.gov.uz”da 11 iyulgacha davom etadi.