Ispaniya hukumati Atlantika okeanida «narko-suv osti kemasi» ekipaji hibsga olinganini e’lon qildi.
Bu haqda Euronews xabar bermoqda.
Ma’lum qilinishicha, Kadisdan 450 kilometr uzoqlikda kontrabandachilar Ispaniya soliq agentligining bojxona nazorati xizmati kemasi tomonidan kuzatilgan.
U qayiqqa yaqinlashgan zahoti ekipaj pastki klapanlarni ochib, kemani yuki bilan birga cho‘ktirdi, deyiladi xabarda.
Mahalliy hokimiyat ma’lumotlariga ko‘ra, Kolumbiya suv osti kemasining to‘rt nafar ekipaj a’zosi qo‘lga olingan.
Jinoyatchilarni qidirish va qo‘lga olish bo‘yicha operasiya AQSh Narkotiklarga qarshi kurash boshqarmasi narkotik jo‘natmasini olib o‘tish ehtimoli haqida ma’lumot berganidan keyin boshlangan.