AQShdagi savdo markazida otishma yuz berdi

AQShdagi Kremniy vodiysi hududi joylashgan savdo markazida otishma yuz berdi, deb xabar bermoqda Los Angeles Times.

Nashrning xabar berishicha, “Qora juma” aksiyasi paytida odamga to‘la Westfield Valley Fair savdo markazida noma’lum shaxs o‘q uzgan. Hodisa natijasida 3 kishi jarohatlanib, shifoxonaga yotqizilgan.

Otishmalardan so‘ng odamlar vahimaga tushib, savdo markazidan yugurib chiqishdi, boshqalari do‘konlardan panoh izlashdi, javonlar va kiyim ilgichlar ortiga yashirinishdi.

"O‘q uzgan shaxs voqea joyidan qochib ketgan, polisiya uni qidirish ishlarini davom ettirmoqda", deyiladi xabarda.

Polisiyaning dastlabki ma’lumotlariga ko‘ra, gap terakt haqida emas, balki noma’lum o‘qchi va yaralangan erkak o‘rtasidagi mojaro haqida ketmoqda. Serjant Xorxe Garibayning so‘zlariga ko‘ra, yaralangan ayol va qizning "voqeaga hech qanday aloqasi yo‘q" va ular tasodifan jabrlangan.