АҚШдаги савдо марказида отишма юз берди

АҚШдаги Кремний водийси ҳудуди жойлашган савдо марказида отишма юз берди, деб хабар бермоқда Los Angeles Times.

Нашрнинг хабар беришича, “Қора жума” акцияси пайтида одамга тўла Westfield Valley Fair савдо марказида номаълум шахс ўқ узган. Ҳодиса натижасида 3 киши жароҳатланиб, шифохонага ётқизилган.

Отишмалардан сўнг одамлар ваҳимага тушиб, савдо марказидан югуриб чиқишди, бошқалари дўконлардан паноҳ излашди, жавонлар ва кийим илгичлар ортига яширинишди.

"Ўқ узган шахс воқеа жойидан қочиб кетган, полиция уни қидириш ишларини давом эттирмоқда", дейилади хабарда.

Полициянинг дастлабки маълумотларига кўра, гап теракт ҳақида эмас, балки номаълум ўқчи ва яраланган эркак ўртасидаги можаро ҳақида кетмоқда. Сержант Хорхе Гарибайнинг сўзларига кўра, яраланган аёл ва қизнинг "воқеага ҳеч қандай алоқаси йўқ" ва улар тасодифан жабрланган.