AQSh Oliy sudi abort tabletkalarini pochta orqali yuborish huquqini vaqtincha tikladi

AQSh Oliy sudi abort uchun qo‘llaniladigan mifepriston preparatini pochta orqali yetkazib berishga qo‘yilgan cheklovni vaqtincha bekor qildi.

Qarorga ko‘ra, preparatni mamlakat bo‘ylab yana masofadan buyurtma qilish mumkin bo‘ladi. Biroq sud bu qaror yakuniy emasligini ta’kidladi.

Avvalroq Luiziana shtati ma’muriyati AQSh Oziq-ovqat va dori vositalari agentligi — FDA ustidan sudga murojaat qilib, mifepristonni pochta orqali yuborish shtatdagi abort taqiqini buzishini bildirgan edi.

2026 yil may oyi boshida Beshinchi apellyasiya sudi Luiziana foydasiga qaror chiqarib, abort tabletkalarini faqat shaxsan berish talabini vaqtincha tiklagan va preparatni pochta orqali yuborishni taqiqlagan.

Shundan so‘ng Danco Laboratories va GenBioPro kompaniyalari Oliy sudga favqulodda murojaat kiritdi. Sud mazkur cheklovlarni kamida 21 maygacha to‘xtatib turishga qaror qildi.

Oliy sudning konservativ sudyalari Klarens Tomas va Samuel Alito bu qarorga qarshi chiqqan. Tomas mifepristonni pochta orqali yuborishni “jinoiy faoliyat” deb atagan.