Aleksey Navalniy 30 kunlik hibsdan so‘ng ozod qilindi

Muxolifatchi Aleksey Navalniy 27 iyul kuni norozilik namoyishiga chaqirgani uchun ma’muriy hibsda saqlanayotgan Moskva Markaziy Ichki Ishlar Boshqarmasining 1-sonli maxsus tergov hibsxonasidan ozod qilindi. Bu haqda Navalniyning matbuot kotibi Kira Yarmish o‘z “Tvitter”ida xabar berdi.

24 iyul kuni Simonovskiy sudi Navalniyni 30 kunlik ma’muriy hibsga oldi. U ommaviy tadbirni tashkil qilish yoki o‘tkazish uchun belgilangan tartibni takroran buzganlikda aybdor deb topildi. 30 iyul kuni Moskva shahar sudi ushbu qarorni qo‘llab-quvvatladi.

Eslatib o‘tamiz, hibsga olinish paytida, ya’ni 28 iyul kuni Navalniy sog‘lig‘idagi shikoyatlari tufayli 64-sonli shahar kasalxonasiga yotqizilgan. Ertasi kuni muxolifat hibsxonaga qaytarilgandi.