AQSh xorijlik jurnalist va talabalar vizasiga cheklov kiritishni ko‘rib chiqmoqda

AQSh ma’muriyati talabalar, almashinuv dasturi ishtirokchilari va xorijlik jurnalistlar uchun vizalar muddatini qisqartirish rejasini e’lon qildi.

AQSh xorijlik jurnalist, talaba va almashinuv dasturi ishtirokchilari vizasiga aniq muddat belgilash taklifini muhokamaga qo‘ydi. Bu haqda Reuters xabar berdi. Vashingtonda qabul qilingan hukumat taklifiga ko‘ra, xorijlik talabalarning F vizalari, madaniy almashinuv dasturida qatnashuvchilarning J vizalari va matbuot vakillari uchun I vizalariga belgilangan muddat joriy etiladi. Hozirda bu turdagi vizalar dastur yoki ish davomiyligiga qarab berilayotgan edi.

Ma’lumotlarga ko‘ra, 2024 yilda AQShda taxminan 1,6 million talabaga F vizasi berilgan. Shuningdek, 355 ming almashinuv dasturi ishtirokchisi va 13 ming jurnalistga viza ajratilgan. Yangi taklifga ko‘ra, talabalar va almashinuvchilar uchun vizalarning eng uzoq muddati to‘rt yilni tashkil etadi. Jurnalistlar uchun esa viza 240 kungacha, Xitoy fuqarolari uchun esa 90 kun bilan cheklanishi mumkin.

Taklifda vizani uzaytirish imkoniyati qoldirilgan bo‘lsa-da, yangi tartib xorijlik talabalar va jurnalistlar uchun qo‘shimcha byurokratik to‘siqlar yaratishi kutilmoqda.

Mazkur reja Trampning ilk prezidentlik davrida, 2020 yilda qo‘yilgan taklifni eslatadi. O‘shanda xalqaro ta’lim tashkiloti NAFSA bu tashabbusga qarshi chiqqan edi. Keyinchalik, Jo Bayden ma’muriyati 2021 yilda taklifni qaytarib olgan.

Tramp ma’muriyati qonuniy migrasiya ustidan nazoratni kuchaytirar ekan, talabalar va migrantlarning ayrimlariga viza va yashash maqomini bekor qilish amaliyotini ham yo‘lga qo‘ygan.

Avvalroq, Tramp ma’muriyati AQSh vizasiga ega 55 mln kishini tekshirishni boshlagani haqida xabar berilgan edi.