Turkiyada erkakni pichoqlagan 13 yoshli bola O‘zbekiston fuqarosi emas – Bosh konsulxona

"13 yoshli o‘zbekistonlik bola Turkiyada odam o‘ldirishga urindi" sarlavhali xabar asossiz bo‘lib chiqdi

2025 yil 26 avgust kuni internet tarmog‘ida va ayrim messenjerlarda tarqalgan “13 yoshar o‘zbekistonlik bola Turkiyada odam o‘ldirishga urindi” sarlavhali xabar asossiz ekani ma’lum qilindi.

Bosh konsulxona diplomatlari tomonidan olib borilgan o‘rganishlar natijasida quyidagilar aniqlangan:

• Voqea 2025 yil 22 avgust kuni Istanbul shahridan 521 km uzoqlikda joylashgan Aksaray viloyatida sodir bo‘lgan;

• Voqea ishtirokchilari orasida O‘zbekiston Respublikasi fuqarolari yo‘q, ular boshqa davlat fuqarolari hisoblanadi;

• Ayblanuvchi — 2012 yilda tug‘ilgan S.T., jabrlanuvchi esa — 2000 yilda tug‘ilgan M.O.

Shu o‘rinda ta’kidlash joizki, ba’zan boshqa davlat fuqarolari tomonidan sodir etilgan jinoyatlar ayrim ommaviy axborot vositalarida O‘zbekiston fuqarolariga nisbat berilishi xalqimizning xalqaro imijiga salbiy ta’sir ko‘rsatmoqda.

Bosh konsulxona vatandoshlarimizni mahalliy qonunlarga qat’iy rioya qilishga va favqulodda holatlarda Konsulxonaga tezkor ravishda murojaat qilishga chaqirmoqda.