Tizim dronlar va minomyotlardan keladigan hujumlarning barcha darajalarini, shuningdek, yuqori tezlikdagi ballistik raketalarni aniqlash va yo‘q qilish imkoniyatini ta’minlaydi.
Anqarada Rajab Toyyib Erdo‘g‘on Turkiyaning milliy integrasiyalashgan havo mudofaa tizimi «Po‘lat gumbaz»ni rasman ishga tushirdi. Bu haqda Associated Press nashri xabar berdi.
Erdo‘g‘on ASELSAN zavodidagi marosimda bu tizim Turkiya mustaqilligining ramzi ekanini ta’kidlab, «havo mudofaasida yangi davr boshlandi», deya bayonot berdi. Prezidentning ta’kidlashicha, loyihaning so‘nggi bosqichida 460 mln dollarlik 47 ta harbiy texnika joriy qilingan.
«Po‘lat gumbaz» dengiz va quruqlikdagi mudofaa platformalari hamda sensorlarini yagona tarmoqqa birlashtirib, mamlakat osmonini dronlar, minomyotlar hamda 180 kmgacha masofadagi ballistik raketalardan himoya qilishga qodir. Tizimning to‘liq qachon ishga tushishi aniqlanmagan.
Erdo‘g‘onning so‘zlariga ko‘ra, o‘z radari va mudofaa tizimiga ega bo‘lmagan davlat xavfsizlik tahdidlari sharoitida kelajakka ishonch bilan qaray olmaydi. U mintaqadagi Suriya va Ukrainadagi mojarolar, shuningdek, Isroilning Eronga qilgan hujumlarini kuchli mudofaa zarurligini ko‘rsatuvchi omil sifatida qayd etdi.
2019 yilda Turkiya Rossiyadan S-400 xarid qilgan, ammo shu sabab AQSh yetakchiligidagi F-35 dasturidan chiqarilgan edi. Shundan keyin Anqara o‘z mudofaa ishlanmalariga katta sarmoya kirita boshladi. Hozirda Turkiyaning mudofaa sohasidagi tashqi bog‘liqligi 2000-yillardagi 80 foizdan 20 foizga tushgan.
Marosimda ASELSANning 2026 yilda ishga tushirilishi rejalashtirilgan yangi ishlab chiqarish majmualari ham e’lon qilindi. Erdo‘g‘on Turkiya keyingi 50 yilda nafaqat o‘z ehtiyojini qondiruvchi, balki jahon texnologiyasida yetakchi bo‘lishini ta’kidladi.
Maktablarda 1 sentyabrdan smartfondan foydalanish taqiqlanadi
Keyingi 5 yil ichida boshlanishi mumkin bo‘lgan 5 ta urush
AQSh Kongressiga nomzod Valentina Gomes Qur’onni yoqib yubordi
