Bugun 4 iyul, 2025 yil, juma

КИР

Tramp Yaponiyaga 35 foizlik boj joriy etish bilan tahdid qilmoqda

Tramp Yaponiyaga 35 foizlik boj joriy etish bilan tahdid qilmoqda

AQSh Prezidenti Donald Tramp Yaponiya bilan savdo kelishuvi amalga oshmas ekan, mamlakatga 35 foizgacha boj to‘lovi qo‘llashini bildirdi. Uning ta’kidlashicha, buni amalga oshirish uchun belgilangan muddat kelasi hafta tugaydi.

AQSh Prezidenti Donald Tramp Yaponiya bilan savdo muzokaralari bo‘yicha kelishuvga erishilmasa, mamlakatga 30 yoki 35 foizlik boj to‘lovlari joriy etilishi mumkinligini ma’lum qildi. U bu haqda 1 iyul kuni Vashingtonda jurnalistlarga bildirgan.

Trampning ta’kidlashicha, bu bojlar 2 aprel kuni joriy qilingan 24 foizlik bojlardan ancha yuqori bo‘ladi. Shu kuni Tramp dunyo mamlakatlariga katta import bojlarini e’lon qilgan edi. Keyinchalik Yaponiya va boshqa ko‘plab davlatlar uchun bojlar vaqtinchalik 10 foizga tushirilgan va 90 kun muzokaralar uchun berilgan edi.

Bu muddat 9 iyul kuni yakunlanadi va Tramp uni uzaytirish niyati yo‘qligini ta’kidlamoqda. U Yaponiya bilan kelishuv bo‘lishiga shubha bilan qarayotganini bildirgan. «Yaponiya bilan muzokara olib bordik. Fikrimcha, kelishuv bo‘lmasligi mumkin» dedi Tramp Air Force One bortida jurnalistlarga.

Yaponiya rasmiylari Trampning bu tahdidiga javob berishdan bosh tortdi. Yaponiya Bosh vaziri o‘rinbosari Kadzuxiko Aoki bu masalada izoh bermaganini bildirdi.

Ayni paytda Yaponiyadan AQShga eksport qilinayotgan mahsulotlarning aksariyati 10 foizlik boj to‘lamoqda. Shuningdek, yapon avtomobillari va ehtiyot qismlariga 25 foiz, po‘lat va alyuminiyga esa 50 foizlik boj qo‘llanmoqda.

Yaponiya Bosh kotibi Yoshimasa Xayashi esa, AQSh bilan kelishuv qilish uchun Yaponiya fermerlarining manfaatlariga zarar yetkazadigan hech qanday imtiyoz berish niyati yo‘qligini ma’lum qildi.

Tramp esa Yaponiyani AQShdan guruch xarid qilmaslikda tanqid qilib, Yaponiyada guruch tanqisligi borligini qayd etgan. U bu fikrlarini Truth Social orqali bildirgan.

Tramp 90 kunlik muzokaralar davomida 90 ta savdo kelishuvi imzolashini aytgan edi, ammo bu vaqt ichida faqat Buyuk Britaniya AQSh bilan kelishuvga erishdi.

Kiritildi: 16:13 02.07.2025. O'qildi: 532 marta. Fikrlar soni: 0 ta.
telegram channel

Bo'limga tegishli qiziqarli xabarlar

Eng ko'p o'qilgan yangilik

Fikr bildirish uchun qaydnomadan o'tishingiz so'raladi va telefon rakamni tasdiklash kerak buladi!