Tramp: «Trump card» olish uchun 15 mingdan ortiq xorijlik ariza topshirdi

15 mingdan ortiq xorijlik fuqarolar AQShda doimiy yashash uchun yangi ruxsatnoma — «Trump card»ni olishga qiziqish bildirdi, deb xabar beradi TASS.

AQSh hukumati ulardan 75 milliard dollar yig‘ishga umid qilmoqda. Bu haqda AQSh prezidenti Donald Tramp ma’lum qildi.

«Kecha kechasi Trump card olish uchun ariza topshirish sayti ishga tushirilgandan so‘ng 15 mingdan ortiq odam ro‘yxatdan o‘tdi va kutish ro‘yxatiga qo‘shildi. Bu - byudjetimizni muvozanatlash va Amerikani mustahkamlash uchun sarflanadigan 75 milliard dollar», - dedi AQSh prezidenti Truth Socialda.

Trump card olish tizimi hali ishlamayapti. Shunga ko‘ra, AQSh hukumati hali bunday to‘lovlarni qabul qilmayapti.

AQSh prezidenti mart oyida Fox News telekanaliga bergan intervyusida ushbu yangi turdagi yashash uchun ruxsatnomani “Trump card” (ingliz tilidagi «trump card» iborasi karta o‘yinlarida «kozir karta» degan ma’noni anglatadi) deb atash mumkinligini aytdi. AQSh ma’muriyati rahbari ushbu kartalar savdosidan tushgan barcha mablag‘ AQShning 36 trillion dollardan ortiq astronomik davlat qarzini kamaytirishga yo‘naltirilishini ta’kidladi.

Prezidentning so‘zlariga ko‘ra, bu yashash uchun ruxsatnomalar 5 million dollarga sotiladi.

«Aytaylik, ularning 1 millionini sotamiz. Bu 5 trillion dollar», — dedi u.

Tramp, shuningdek, agar AQSh rasmiylari ushbu kartalarni sotib olgan xorijliklar ustidan jiddiy shikoyat qilsa, ularning pullari qaytarilishi va o‘z mamlakatlariga deportasiya qilinishi haqida ogohlantirdi. Albatta, u ushbu kartani sotib olmoqchi bo‘lganlar AQSh maxsus xizmatlari tomonidan “tegishli ekspertiza”dan o‘tishini ham aytdi.

Ushbu yangi karta xorijiy investorlarga AQShda yashash imkonini beruvchi EB-5 dasturi o‘rnini bosadi.