Зилзила пайтида Покистон қамоқхонасидан 200 дан ортиқ маҳбус қочиб кетди

Покистоннинг Карачи шаҳридаги Малир тумани қамоқхонасидан кичик зилзила пайтида эвакуация қилинган 200 дан ортиқ маҳбус қочиб кетди.

Бу ҳақда Покистон ОАВлари маҳаллий полицияга таяниб хабар берди.

Хабар қилинишича, полиция ҳудудни ўраб олган, натижада 78 маҳбус қўлга олинган, отишмада бир киши ҳалок бўлган. Уч нафар хавфсизлик ходими яраланган.

Воқеа душанба куни кечқурун содир бўлган. Ҳаммаси бўлиб 2000 га яқин маҳбус эвакуация қилинган, улардан 213 нафари қочишга муваффақ бўлган.