Зеленский Украинанинг Россия билан музокаралардаги кейинги иштироки масаласини қачон ҳал қилади?

Зеленский Украинанинг Россия билан музокаралардаги кейинги иштироки масаласини асирлар алмашинуви якунланганидан сўнг ҳал қилишини айтди.

"Алмашинув тахминан 20–21 июн кунлари якунланади. Шундан сўнг, биз кейинги қадамларимизни муҳокама қиламиз", — дея изоҳ берди Украина президенти.

Володимир Зеленскийнинг бошқа баёнотлари:

◾️ Украина ва АҚШ президентлари жамоалари G7 саммити доирасида менинг Трамп билан учрашувимни ўтказиш устида ишлашмоқда. Биз ушбу учрашувда Москва билан кейинги музокаралар ва Россияга қарши санкциялар масалаларини кўтаришни режалаштирмоқдамиз;

◾️ Бизга Қўшма Штатлар президентининг сиёсий иродаси керак, Трамп кучли қадамлар ташлашини истаймиз;

◾️ АҚШ президенти ҳали Россияга қарши санкциялар киритиш ёки киритмасликка қарор қилмаган бўлса, демак у буни қандайдир кучли ҳаракат учун сақлаб қолмоқда. Балки у Россия билан "мулоқот ойнаси”ни бутунлай ёпиб қўйишдан чўчиётгандир;

◾️ Украина Қўшма Штатлардан олишни истаётган “глобал даражада кучли” қуроллар пакети бўйича таклиф тайёрлаган. Аммо бу масалада президентлар даражасида келишув зарур, бу харид бўйича пакет кўринишида бўлиши мумкин;

◾️ АҚШ Яқин Шарқ минтақасига 20 мингта ракеталарни жўнатди, Украина уларни олишга умид қилаётган эди. Бу биз учун оғир зарба бўлди, бироқ бу Исроилнинг Эронга қарши операцияси яқинлашаётгани учун амалга оширилди;

◾️ Россияликлар Суми вилоятида тўхтатиб қолинди, биз позицияларимизни мустаҳкамлаяпмиз;

◾️ Россияликларнинг Днепропетровск вилоятидаги ҳаракатлари ҳақидаги хабарлар ҳақиқатга тўғри келмайди. Россия армияси қандай бўпмасин Днепропетровскнинг маъмурий чегарасига суқилиб киришга уринмоқда.