Зеленский Роман Абрамович билан учрашганини тасдиқлади

Украина президенти Владимир Зеленский Киевга у билан учрашиш учун келган россиялик бизнесмен Роман Абрамович бўлганини маълум қилди. Бу ҳақда у Sky News телеканалига берган интервьюсида айтиб ўтди.

У Киевга келган эди. “Сизга бевосита етказишим керак бўлган хабар бор. Шунингдек, сиздан хабар олиб, уни Путинга етказмоқчиман”, деди. Бироқ буни ошкор қилмасдан, ими-жимида амалга ошириш кераклигини айтди. Мен эса “Бу сизнинг танловингиз. Биз учун бунинг очиқ ёки ёпиқ тарзда бўлишининг фарқи йўқ”, деб жавоб бердим, деди Зеленский.

Зеленскийнинг фикрича, Абрамович Киев тинчлик музокаралари масаласида нималарга тайёр эканини билмоқчи бўлган. Зеленский эса унга Украина Россияга Донбассни бермаслигини айтган.

Бу асосий хабар эди. “Биз кетмаймиз, сизга бундай йўл билан ғалаба қозониш имконини бермаймиз”, дедим, дея қўшимча қилди Украина президенти.

Томонлар, шунингдек, қайси масалаларда муросага бориш мумкинлигини ҳам муҳокама қилган. Зеленский Абрамовичга ўт очишни тўхтатишга эришилганидан кейингина муросага келиш имконияти борлигини билдирган.

5 июнь куни Владимир Путин Санкт Петербург халқаро иқтисодий форуми давомида Зеленский билан учрашиш учун Киевга россиялик бизнесменлардан бири борганини маълум қилганди.