Хитой очган янги транспорт йўлагида юкларни Қозоғистонни айланиб ўтган ҳолда Ўзбекистонга етказиш имконияти пайдо бўлди. The Global Times нашрининг хабар беришича, илк юк поезди 5 июнь куни Ганьсу провинциясининг Ланьчжоу шаҳридан Тошкент сари йўлга тушган.
Йўналиш Қирғизистон ҳудуди орқали ўтади. Поезд Қашқаргача боради ва у ердан юклар автомобилда Қирғизистоннинг Иркештом шаҳрига, у ердан эса Ўшга олиб борилади. Ўшда яна поездга ортилган юклар Тошкентга етказилади.
Ланьчжоудан йўлга чиққан илк поездда умумий қиймати 2,6 миллион долларга тенг электр жиҳозлари бор. Хитойга эса Ўзбекистондан қарийб 1 миллион долларлик – 525 тонна ип газлама жўнатилади.
Янги транспорт йўлагининг узунлиги 4320 километрга тенг, юк ташиш учун 7-10 кун керак бўлади. Янги йўлак Қозоғистон ҳудуди (Хоргос) орқали ўтган йўналишдан 300 километр қисқароқ.