Хитой БМТга SpaceX устидан шикоят қилди

Хитой расмийлари америкалик тадбиркор Илон Маскка тегишли SpaceX хусусий космик компанияси устидан БМТнинг Коинот ишлари бўйича бошқармасига шикоят қилди, дея хабар бермоқда Deutsche Welle.

Пекиннинг билдиришича, Маск томонидан Starlink лойиҳаси доирасида июль ва октябрь ойларида учирилган сунъий йўлдошлар Хитой қураётган “Тяньгун” космик станциясига хавфли даражада яқинлашган. Натижада Хитой аппарати ўз траекториясини ўзгартиришга мажбур бўлган.

Иккала ҳодиса пайтида ҳам космик станцияда хитойлик астронавтлар бўлган. Хитой томонининг фикрича, юз берган ҳодисалар амалдаги космик шартномаларнинг бузилишидир.

Пекиннинг баёноти ортидан Хитой ижтимоий тармоқларида Маскнинг SpaceX ва Tesla компанияларини бойкот қилишга чақириқлар янграй бошлаган.