Чеченистон раҳбарининг шериклари Мариупол металлургия заводи жиҳозларини демонтаж қилиш ва сотиш, шунингдек, Россиянинг Ғарб санкцияларига учраган автомобил ишлаб чиқарувчиларига металлолом жўнатиш ва инерт газларни Россия космик дастурига ўтказиш билан шуғулланмоқда. Бу ҳақда The Wall Street Journal нашри завод раҳбарлари ва олинган ҳужжатларга таяниб хабар берди.
"Россия қўшинлари Мариупол устидан назорат ўрнатганидан кўп ўтмай, оператив тарзда ташкил этилган маҳаллий компания ишини тўхтатган заводдан пўлат маҳсулотларини Россия Федерациясига экспорт қила бошлади. Ушбу компания 2022 йил август ойида икки киши раҳбарлигида рўйхатдан ўтказилган. Улардан бири чечен тадбиркори Валид Корчагин, иккинчиси эса ҳарбийлар билан алоқадор россиялик тадбиркор Юрий Мурайдир. У Россия томонидан аннексия қилинган Қримга Россия Мудофаа вазирлиги учун юк олиб келган", дейилади хабарда.
Нашрнинг маълум қилишича, металлургия заводига кираверишда Қодировнинг портрети ва “унинг чечен ҳарбий бўлинмасининг эмблемаси” бор. Гап Қодировга бўйсунувчи “Ахмад” махсус отряди ҳақида кетмоқда. Март ойида россияпараст расмийлар сўнгги олти ой ичида заводдан 14,7 миллион евро қийматидаги 130 минг тонна темир қўшимча маҳсулоти олиб кетилганини билдирган эди. Заводнинг собиқ эгасининг айтишича, 203 миллион евролик ишлаб чиқариш линияси ҳам демонтаж қилинган ва Россия Федерациясига юборилган.
Қодировнинг ҳамкори Вахит Геремеевнинг айтишича, ҳозирча цехларда фақат металлолом ва чўян қолдиқларини қайта ишлаш мумкин, аммо у 2026 йилгача пўлат ишлаб чиқаришни қайта йўлга қўйиш устида ишламоқда.
