Кеча Ўзбекистон Инвестициялар, саноат ва савдо вазирлиги ва Хитойнинг BYD конгломерати ўртасида "Ўзбекистонда гибрид ва электр автомобиллар ва уларнинг бутловчи қисмларини ишлаб чиқаришни ташкил қилиш" Инвестиция битимини имзолашнинг тантанали маросими бўлиб ўтди, деб хабар бермоқда «Дунё» АА.
Инвестициялар, саноат ва савдо вазирлиги (ИССВ) маълумотига кўра, 2022 йилда Хитой концерни муқобил энергияда ҳаракатланувчи автомобиллар ишлаб чиқариш бўйича жаҳон етакчисига айланди.
Имзоланган ҳужжатга кўра, «BYD Auto» компанияси ва «O'zavtosanoat» АЖ томонидан мамлакатимизда гибрид ва электр автомобиллар ишлаб чиқарувчи " BYD Uzbekistan Factory " қўшма корхонаси ташкил этилади. Инвестиция лойиҳасининг биринчи ва иккинчи босқичларида режалаштирилган ишлаб чиқариш ҳажми 50 минг дона, учинчи босқич якунланиши билан эса бу кўрсаткич 300 минг дона автомобилни ташкил этади.
Маросимда таъкидланганидек, «BYD Uzbekistan Factory» электромобиллар бўйича жаҳон етакчисининг Хитойдан ташқарида биринчи қўшма корхонаси бўлади, бунга Ўзбекистоннинг машинасозлик соҳасида саноат, фан ва техника ютуқлари ҳамда Ўзбекистоннинг инвестициявий жозибадорлиги туфайли эришилди.
