Ўзбекистон парламент сайловларида овоз бериш учун Россияда 7 та сайлов участкаси ташкил этилади

Россияда бўлиб турган Ўзбекистон фуқароларининг 27 октябр куни бўлиб ўтадиган парламент сайловларида иштирок этиши учун еттита сайлов участкаси ташкил қилинади.

Бу ҳақда Ўзбекистон Марказий сайлов комиссияси маълумотларига таяниб Россиянинг ТАСС ахборот агентлиги маълум қилди.

Ўзбекистоннинг ўзида парламентнинг Қонунчилик (қуйи) палатасига депутатлар сайловини ўтказиш учун 11 мингга яқин сайлов участкаси очилади. Шунингдек, 56 та сайлов участкаси 39 давлатда, шу жумладан Россияда еттита участка очилади.

Бундан ташқари, сайловга тайёргарлик доирасида saylov.mfa.uz сайти ишга туширилди. У хорижда бўлган Ўзбекистон фуқароларига консуллик рўйхатидан ўтмасдан туриб, сайловчилар рўйхатига киритиш учун аризани электрон шаклда юбориш имконини беради.

Ўзбекистон Марказий сайлов комиссияси маълумотига кўра, парламент сайлови бўйича сайловчилар рўйхатига дастлабки ҳисоб-китобларга кўра 20,5 миллиондан ортиқ киши киритилган.

"Парламентнинг қонунчилик (қуйи) палатасига депутатлар сайлови аралаш сайлов тизими, яъни мажоритар-пропорционал тизим асосида ўтказилади. Хусусан, 150 нафар депутатдан 75 нафари бевосита мажоритар тизим асосида, яъни сайловчилар ўзларига мақбул номзодларга овоз бериши йўли билан, қолган 75 нафари эса, пропорционал тизим бўйича сиёсий партияларга берилган овозлар асосида сайланишади", – дейилади ТАСС тарқатган мақолада.