Ўзбекистон Осиё ва Океания Кубоги финалида!

Бугун, 30 апрель куни соат 19:30да финалда Ўзбекистон терма жамоасининг Тайланд жамоаси билан матчи бўлиб ўтади. Ярим финал учрашувида БАА терма жамоаси ишончли тарзда мағлуб этилди.

Душанба куни эрта тонгда Ҳакамлар қўмитасидан хабар келди - Қувайт ва Индонезия жамоалари Регламентни бузгани учун дисквалификация қилинди. Эслатиб ўтамиз, қувайтликлар Ўзбекистонга қарши ўйинни якунлай олишмаган, Индонезия борасида эса баъзи футболчиларнинг спорт фуқаролиги билан боғлиқ муаммолари аниқланган. Шу муносабат билан тўққизинчи ўрин учун матч бекор қилинди ва ярим финалда Ўзбекистоннинг рақиби «Б» гуруҳида учинчи ўринни эгаллаган БАА терма жамоаси бўлди.

Матч олдидан ҳакамларнинг навбатдаги хабарлари бироз ранжитди - бирданига уч нафар ўзбекистонлик хоккейчи дисквалификация қилинди - ҳимоячилар Хусан Раҳимов ва Темур Багаутдинов, шунингдек, форвард Руслан Султанов, охирги икки нафар ўйинчи эса нақ иккита ўйинга четлаштирилди. Бир йил давомида тайёргарлик кўрилган турнирнинг ҳал қилувчи ўйинларини ўтказиб юбориш алам қилади, албатта.

Ярим финалда БААга қарши ўйинда таркиб ўйинчиларининг йўқлиги билинмади ҳам – гуруҳдаги устунлик уларга рақиб билан муаммосиз курашиш имконини берди. Навбатдаги кўп очколар ўйини 8 (4+4) очко жамғарган Жасурбек Рустамхонов ҳисобига ёзилди. Унинг учликдаги шериги Салоҳиддин Азимов бироз сояда қолган бўлсада, ҳимоячи Лорен Петросян ўзини аъло даражада кўрсатиб, шайба дублини қайд этди. Матчнинг ўнинчи шайбаси, айниқса, чиройли чиқди - Рустамхонов ўз дарвозасидан Иля Поповга чуқур узатмани амалга оширди, иккитага бир ўйинчи комбинацияси ва якундаги Алберт Дадаходжаевга аъло даражадаги узатма.

Учинчи даврда Ўзбекистон терма жамоаси қувватни тежаган ҳолда ўйнаб, бор-йўғи иккита шайба уришга муваффақ бўлди. Бош мураббий Абдумажид Насировнинг ўйиндан сўнг айтганидек, мақсад дисквалификацияга учрамасдан, ўйинни хотиржам якунлаш эди. Иккинчи ярим финалда Тайланд терма жамоаси Мўғулистонни 7:4 ҳисобида мағлуб этди.

Ўзбекистон - Тайланд ўртасидаги финал ўйини 30 апрель сешанба куни соат 19:30да бўлиб ўтади. Йигитларимизни орзу қилган кубок учун курашда қўллаб-қувватлаш жуда муҳим. Чипталар ИТиcкет.уз сайтида. Эслатиб ўтамиз, ушбу жамоалар турнирда аллақачон гуруҳ босқичида тўқнаш келишган ва ўшанда Ўзбекистон ўсмирлар терма жамоаси 7:5 ҳисобида ғалаба қозонган эди.