Хитойнинг Хайнан провинцияси Хайкоу шаҳрида бўлиб ўтаётган "Тўртинчи Хитой халқаро истеъмол товарлари кўргазмаси"да Ўзбекистон миллий маҳсулотлари намойиш этиляпти, деб хабар бермоқда "Дунё" АА мухбири.
Кўргазма павильонида мамлакатимизнинг экспорт ва туризм салоҳиятини ўзида акс эттирган ҳунармандчилик, зардўзлик, ёғоч ўймакорлиги, ипак маҳсулотлари ва сопол буюмлари ҳамда халқ амалий санъатининг ранг-баранг намуналари намойиш этилмоқда.
"Ўзбекистон кулолчилик ва наққошлик мактаби ўзига хос ва қадим тарихга эга. Ушбу кўргазмада кўрган Риштон сопол идишлари менга жуда ёқди. Хайнан бозорида ушбу идишларни сотиш ва сотиб олишга қизиқиш бор", – деди иштирокчиларидан бири Янг Лин.
Шунингдек, кўргазма меҳмонлари эътиборига Ўзбекистоннинг экспорт ва туризм имкониятлари ҳақида маълумот берувчи хитой тилидаги тарғибот материаллари тарқатиляпти ҳамда мамлакатимизнинг қадимий шаҳарлари ва маданиятига бағишланган видеороликлар намойиш этилмоқда.
Мазкур тадбир Ўзбекистон ҳунармандчилик маҳсулотларини Хитой бозорига экспортини кенгайтиришга қаратилган бўлиб, кўргазма давомида кўплаб хорижий импортёрлар ва ишбилармонлар ўзбек томони билан ҳамкорлик қилишга қизиқиш билдирди.
Шу ўринда таъкидлаш керакки, ХХРнинг турли ҳудудларида мамлакатимизнинг бой тарихи ва маданияти бўйича тақдимотлар ўтказиш ҳамда экспортбоп маҳсулотларнинг намойиш этилиши Ўзбекистон товарларининг Хитой бозорига кириб бориши ва маҳаллий истеъмолчилар томонидан қизиқишнинг ортиб боришига хизмат қилмоқда.
ЕЧЛ. Ярим финал. "Бавария" "Реал" билан жанговар дуранг қайд этди
Россия иқтисодиёти қулаши мумкин
Россия ИИВ 400 га яқин муҳожирни Россия паспортидан маҳрум қилди
