Украина ҳарбий разведкасига янги раҳбар тайинланди

Украина президенти Владимир Зеленский Ташқи разведка хизматини (СВР) бошқарган Олег Ивашченкони Бош разведка бошқармаси раҳбари этиб тайинлади.

Бу ҳақда Украина раҳбари ўзининг Telegram-каналида ёзди.

"Бугундан бошлаб Олег Ивашченко мамлакатимизга хизмат қилишда давом этади ва Украина ҳарбий разведкаси позицияларида Россия ҳарбий салоҳиятини чеклаш бўйича топшириқларни бажаради”, — деб ёзган Зеленский.

Унинг таъкидлашича, у Ивашченко билан Ташқи разведка хизмати раҳбари сифатида учрашув ўтказган, унда Ивашченко Украинадаги умумий вазият ва ҳозирги таҳдидлар ҳақида маълумот берган.