Украина АҚШ билан ер ости бойликлари бўйича келишувни амалга оширишга киришди

Украина ҳукумати мамлакатдаги литий конларидан бирини ўзлаштиришни бошлаш бўйича биринчи қадамларни маъқуллади, бу АҚШ билан бир ойдан кўпроқ аввал имзоланган ер қаъри бўйича келишув доирасидаги биринчи аниқ лойиҳа.

Бу ҳақда Украинанинг икки расмий вакилига таяниб, The New York Times нашри хабар берди.

Уларга кўра, Украина ҳукумати душанба куни Добра конида литий ишлаб чиқариш бўйича тендер ўтказиш бўйича тавсиялар тайёрлашни бошлашга рози бўлган. Муҳим фойдали қазилмалар соҳасида стратегик шериклик тўғрисидаги янги шартномага кўра у устувор ҳисобланади.

Потенциал иштирокчилар орасида TechMet энергетика компанияси (қисман АҚШ ҳукуматига тегишли) ва президент Дональд Трампга яқин бўлган америкалик миллиардер Рональд Лаудерни ўз ичига олган инвесторлар консорсиуми бор. Улар 2023 йилдан бери "Добра" конига кириш имкониятини очишни талаб қилмоқда.

Олдин эришилган келишувга кўра, фойдали қазилмаларни қазиб олишдан тушган даромаднинг ярми АҚШ ва Украинанинг қўшма сармоя фондига йўналтирилади. Ушбу маблағларни Украина иқтисодиётига қайта сармоя киритиш режалаштирилмоқда, АҚШ эса фойданинг бир қисмини ўзида сақлаб қолади. Президент Трамп бу схемани "кўрсатилган ёрдамнинг қайтиши" деб атади. Нашрнинг ёзишича, тендер маҳсулот тақсимоти тўғрисидаги битим форматида ўтказилади, бу эса узоқ муддатли сармоявий барқарорликни ва келишмовчиликлар юзага келганда халқаро арбитражни таъминлайди.