Туркиядаги ўрмон ёнғинлари сабабли Измирдаги аэропорт фаолиятини вақтинчи тўхтатди

Туркиядаги Измир халқаро аэропорти вилоятда давом этаётган ўрмон ёнғинлари сабабли парвозларни тўхтатди.

Бу ҳақда Milliyet газетаси хабар бермоқда.

"Аднан Мендерес" аэропорти Газиемир туманидаги ёнғин зонаси яқинида жойлашган. Давом этаётган ўрмон ёнғинлари, тутун ва ўт ўчириш самолётларининг иши туфайли аэропорт самолётларни қабул қилиш ва қўндиришни тўхтатди. Измирга келган баъзи рейслар бошқа аэропортларга йўналтирилди. Ёнғин назоратга олинганидан кейин парвозлар одатдагидек давом этиши кутилмоқда.

Аэропортнинг онлайн бортида баъзи режалаштирилган рейслар кечиктирилган деб кўрсатилган, кўплари бекор қилинган.

Измир губернатори Сулаймон Элбан минтақанинг учта туманида катта ўрмон ёнғинлари содир бўлганини маълум қилди. Ёнғин аҳоли яшаш жойларига етиб борган бир қанча туманлар эвакуация қилинган. Ёнғинни ўчириш учун 1,1 минг ўт ўчирувчи, олтита самолёт, 23 та сув ташиш машинаси, бульдозерлар жўнатилди. Тезлиги соатига 70 дан 117 км гача ўзгариб турадиган кучли шамоллар туфайли ёнғин ўчириш самолётларининг ишлаши ва мунтазам равишда сув тушириши қийин.