Трамп сулоласи сиёсий саҳнада қоладими?

АҚШ президенти Дональд Трампнинг ўғли ва Trump Organisation компанияси ҳамраиси Эрик Трамп Financial Times нашрига берган интервьюсида ўзи ёки Трамп оиласининг бошқа аъзолари келажакда сиёсий фаолиятни давом эттириши мумкинлигини билдирди.

«Мен кўраётган сиёсатчиларнинг ярми менга ҳеч қандай таъсир қолдирмайди. Мен эса бу ролни анча самаралироқ бажара оламан», — деди у. Эрикнинг айтишича, «вақт кўрсатади», ва у Трамп оиласидан бошқа номзодларни ҳам истисно қилмади: «Мендан ташқари яна бошқалар ҳам бор».

Шу билан бирга, у яқинларига тушаётган босим ва стрессни ҳисобга олган ҳолда сиёсатга киришни маъқуллаш ё маъқулламаслик борасида иккиланишини билдирган.

«Мен фарзандларим сўнгги ўн йилда мен бошдан кечирган воқеаларни қайтаришларини истайманми? Ишончим комил эмас. Агар жавоб “ҳа” бўлса, менимча, сиёсий йўл осон бўларди — яъни мен бунга қодирман. Ва айтадиган бўлсам, бизнинг бошқа оила аъзоларимиз ҳам бунга қодир», — деди у.

Эрик Трамп 41 ёшда. У президентнинг учинчи ўғли ва кўп йиллардан бери оилавий бизнес билан шуғулланиб келади. Унга кўра, Дональд Трамп ҳозир компанияни бошқаришда иштирок этмаяпти, чунки у «Учинчи жаҳон урушига йўл қўймаслик»ка йўналган.

Эрик таъкидлашича, агар отаси сиёсат билан шуғулланмаганида, бизнес анча ривожланган ва оиланинг бойлиги ҳам юқорироқ бўлиши мумкин эди.

Дональд Трампнинг беш нафар фарзанди бор: Дональд Жуниор, Иванка, Эрик, Тиффани ва Бэррон. Унинг шунингдек, 11 нафар набираси бор. Президент аввалроқ учинчи муддатга ҳам номзодини қўйиши мумкинлигини айтганди, бироқ АҚШ Конституциясига кўра, бир шахс фақат икки муддат президентлик қилиши мумкин.