Трамп G7 саммитини ўзининг курортида ўтказмайди

АҚШ президенти Дональд Трамп G7 саммитини ўзига қарашли “Trump National Doral Miami” курортида ўтказиш фикридан воз кечди.

Олдинроқ Оқ уй G7 саммити 10-12 июнь кунлари Майамидаги “Trump National Doral Resort” курортида ўтказилишини маълум қилганди. 18 октябрь куни АҚШнинг бир неча нуфузли конгрессменлари саммитнинг Трампга тегишли курортда ўтказилишининг молиялаштиришга қарши қаратилган қонун лойиҳасини тақдим этди.

Трампнинг фикрича, энди саммит АҚШ президентининг Вашингтон ташқарисидаги Кэмп-Дэвид қароргоҳида бўлиб ўтиши мумкин.

«ОАВ ва демократларнинг телбаларча ва мантиқсиз ғайирлиги туфайли Майамидаги Trump National Doral курортини 2020 йилда G7 саммитини ўтказиш манзили сифатида бошқа кўрмаймиз. Зудлик билан янги жойни ахтаришни бошлаймиз. Балки бу Кэмп-Дэвид бўлар», — дея изох қолдирди Трамп “Twitter”даги сахифасида.