Трамп Европанинг миграция сиёсатида кескин бурилишга эришмоқчи

Дональд Трамп бошчилигидаги АҚШ ҳукумати Европанинг миграция сиёсатини наив ва хавфли, деб ҳисобламоқда ҳамда унинг глобал оқибатларидан ташвиш билдирмоқда. Вашингтон Германия, Британия ёки Швеция каби давлатларни қонун ва қоидаларни қаттиқлаштиришга фаол равишда ундамоқда. Бу вазифа келгусида АҚШ элчилари зиммасига юкланади.

Марко Рубио раҳбарлик қилаётган Давлат департаменти АҚШ элчихоналари ва консулхоналари учун директива эълон қилди. Унда айтилишича, улар бошқа давлатларнинг миграция сиёсатини кузатиб бориши ва зарурат туғилганда унга аралашиши керак. Ведомство буни бошқа давлатлардаги «инсон ҳуқуқлари» билан изоҳлайди.

«Оммавий миграция — бу инсон ҳуқуқлари масаласи. [...] Америкалик амалдорлар ҳукуматларни қатъий чоралар кўришга ва фуқароларни оммавий миграция хавфларидан ҳимоя қилишга чақиришади», — дейилади департамент хабарида.

Госдеп Х ижтимоий тармоғидаги билдирувида Ғарб мамлакатлари «жиноятчилик тўлқинлари, терактлар, жинсий зўравонлик ва жамоаларнинг сиқиб чиқарилиши»ни бошидан кечирганини таъкидлайди. Мисол сифатида Госдеп 2020 йилда Гамбург боғида 15 ёшли қизнинг тўққиз нафар эркак томонидан зўрланиши, шунингдек, Британия ва Швецияда мигрантлар иштирокида содир этилган бошқа жиноятларни келтиради. АҚШ Давлат департаменти Европа суд тизимини ҳам кескин танқид қилади:

«Интернетда зўравонлардан бирини ҳақорат қилган немис аёлининг ўзи жиноятчиларга қараганда қаттиқроқ жазо олган».

Бу директива АҚШ вице-президенти Жей Ди Вэнснинг феврал ойида Мюнхен хавфсизлик анжуманида сўзлаган нутқини эслатади:

«Бу ердаги давлатлар дуч келаётган барча муаммолар орасида, менимча, оммавий миграциядан кўра долзарброги йўқ. Йўлни ўзгартиришдан олдин яна қанча даҳшатли зарбаларни бошдан кечиришимиз керак?»

Кўринадики, Давлат департаменти энди АҚШ маъмуриятининг ушбу талабини амалга ошириш учун ҳаракатга ўтмоқда.